Leiðbeiningar varðandi endurnot upplýsinga í skjálftavefsjá Veðurstofu íslands, Skjálfta-Lísu

sbr. 5. gr. laga nr. 45/2018 um endurnot opinberra upplýsinga. Veðurstofa Íslands hvetur alla til að nota og endurnýta þær upplýsingar sem eru gerðar aðgengilegar með Skjálfta-Lísu að uppfylltum eftirfarandi skilyrðum.

Notkun upplýsinga

Með notkun gagna sem eru gerð aðgengileg með Skjálfta-Lísu (hér eftir kallað „upplýsingarnar“) telst þú hafa samþykkt eftirfarandi skilmála og skilyrði.

Veðurstofa Íslands veitir þér ótímabundna heimild til varanlegrar notkunar upplýsinganna hvar sem er, án gjaldtöku og gefur eftir einkarétt sinn, sé honum til að dreifa, að uppfylltum skilyrðunum hér fyrir neðan.

Notandi má:

• afrita, birta, dreifa og senda upplýsingarnar,
• aðlaga upplýsingarnar og
• endurnýta upplýsingarnar, þar með talið í hagnaðarskyni til dæmis með því að setja þær saman við aðrar upplýsingar eða með því að hafa upplýsingarnar sem hluta af vöru eða hugbúnaði.

Notandi verður að:

• Taka fram að þær upplýsingar sem byggt er á eigi uppruna í jarðskjálftakerfi Veðurstofu Íslands með eftirfarandi texta: „Byggt á gögnum frá Veðurstofu Íslands.“ Einnig skal vísa í þessa skilmála þar sem því verður við komið.
• Gæta þess að skýrt komi fram hver ber ábyrgð á vinnslu upplýsinganna þegar þær eru gerðar öðrum aðgengilegar.
• Gæta þess að endurnot upplýsinganna brjóti ekki í bága við lög þ.m.t. ákvæði almennra hegningarlaga, laga um vernd hugverkaréttinda og laga um persónuvernd og vinnslu persónuupplýsinga, eða önnur réttindi þriðja manns.

Ekkert samþykki

Notkun upplýsinganna gefur notanda hvorki heimild til að gefa til kynna að hann sé í opinberri stöðu né að Veðurstofa Íslands hafi samþykkt notkun hans á upplýsingunum sérstaklega.

Notandi hefur ekki heimild til að villa um fyrir öðrum með því að birta upplýsingarnar eða geta um uppruna þeirra með villandi eða röngum hætti.

Engin ábyrgð

Upplýsingarnar veita notanda ekki heimild til framkvæmda eða aðgerða sem annars eru ólöglegar eða þarfnast sérstakra leyfa.

Veðurstofa Íslands er undanskilin fyrirsvari, ábyrgð, skyldum og skaðabótum í tengslum við upplýsingar fengnar með Skjálfta-Lísu að því marki sem lög leyfa.

Veðurstofa Íslands ber ekki ábyrgð á villum eða vanskráningu upplýsinga í Skjálfta-Lísu eða gagna úr jarðskjálftakerfi stofnunarinnar sem Skjálfta-Lísa byggir á og er ekki ábyrg fyrir neinu tapi, meiðslum eða skaða sem hlýst af notkun þeirra. Veðurstofa Íslands ábyrgist ekki áframhaldandi aðgengi að upplýsingum í Skjálfta-Lísu.

Fyrirvarar

Upplýsingar sem notandi fær með Skjálfta-Lísu eru afhentar eins og þær eru og í þeim kunna að vera villur og ónákvæmni um tímasetningu, stærð og staðsetningu jarðskjálfta.

Skjálfta-Lísa virkar með vel flestum nýrri útgáfum af vöfrum en á því kunna að vera undantekningar sem Veðurstofa Íslands verður ekki gerð ábyrg fyrir.

Veðurstofa Íslands verður ekki gerð ábyrg fyrir tjóni sem kann að hljótast ef Skjálfta-Lísa virkar ekki af einhverjum orsökum og/eða þarfnast endurræsingar.

Aðgengi og persónuupplýsingar

Skjálfta-Lísa er aðgengileg án skráningar á opnu vefsvæði og Veðurstofa Íslands skráir ekki upplýsingar um notendur Skjálfta-Lísu.

Tilvísanir

Þessar leiðbeiningar byggja á lögum nr. 42/2018 um endurnot opinberra upplýsinga. Einnig voru höfð til hliðsjónar breska „Open government licence“ http://www.nationalarchives.gov.uk/doc/open-government-licence/version/3